لساك فاكر

لساك فاكر
إن العتمة بتغرب
لما الشمس ترفرف زي حمامة
بين لغصان
وإن الضلة بتروي الأرض المدبوحة
بدوس لقدام المغروسة بطمي النيل
لساك فاكر
إن الشمس بتطلع بين الشجر المنهوك
من كتر الخوف من ضلمة ليلك
لما تشاور انت بإيدك

فاكر إن النور هيجيلك
مانت ماكنتش عارف زيي
إن الأرض بتطرح خوف
لما بتشرب دم وحنضل
لما البحر بيقفل بابه في وش النيل
مش هتصب همومك فيا
خليك تروي الأرض بحزنك
لجل ما تطرح مر وحنضل
زي زمان
ولا نسيت
أصلك دايما فاكر إنك باب الخير
لما تصلي الفجر وتدعي
وتجري تشوف الرزق ف غيطك
رغم البرد وقلة حيلك
شد شويه ومشي
هات الفاس واعزق أرضك
ما الكراس ركنوه ع الحيط
ارجع تاني لأصلك سيبك
من شيخ قاعد يدعي عليك
يفتي الفتوى ويسرق مرتك
وانت تصدق
ما انت عبيط
هتسيبهاله وتخلي البيت
لساك فاكر إنه فقيه
طيب
وانت هتزعل ليه
إياك فاكر نفسك وحدك
كل الناس في بلدنا غلابة
ضحكوا عليهم باسم الدين
وما خلوش مسمار في الحيط
لأ والخيبة
إن الشعب بحاله اتعلم تعليم عالي
وهجر الدار والحويطه وبور أرضه
وركب الفيزبه
وحمار جده بقى تومبيل
ومافيش فايده
جالهم مرشد
لبس الجزمة وسرق الدنيا وقال يافكيك
لساك فاكر انك شاطر
ضحكوا عليك تجار الدين
وابقى قابلني لو سمحولك
ترجع تاني لأرض الخير